Gianni Argurio

 

‘N GH’ JORNU LU DIU PATRI

‘N gh’jornu lu Diu Patri ch’era cuntenti

e passiava ‘n celu cu li Santi

pinzau a lu munnu di fari ‘n prisenti

e da curuna si scippàu ‘n diamanti ...

Ci addutau li setti elementi

e lu pusau nfacci a lu livanti,

lu chiamaru Sicilia li genti

ma di l’Eternu

 

AMURI AMURI

Amuri, amuri, non nt’haju scurdatu,

lu sintimentu mei s’è pirdutu;

Diu sulu sapi quantu t’haju circatu

e lu me’ cori arranca ormai firutu.

Ffàcciti bedda mia fammi cuntentu,

pì tìa no ndormu cchiui e sempri cantu;

Nte vini mi trasisti ora ti sentu ...

Tu si a cchiù bedda ô munnu e mi ni vantu.

Cu tia vogghiu passari la me’ vita

e nvicchiari cuntentu a lu to’ latu;

Lu sannu tutti chi si la me’ zita.

Nciuru chi sugnu pazzu nnamuratu!

Fammi ristari ancora strittu a tia

e dimmi chi mi voi bene assai;

Si mi mancassi tu nì morirìa!

Amuri, amuri, no nti lassu mai.

 

AMURI DILL’AMURI

‘U cielu s’ammantau di culuri ...

è jancu, rrussu focu e curallinu,

è na gran tavuluzza d’un pitturi ...

‘na tila ‘mmenza ricca d’oru finu!

 

 

MI VOTU E MI RIVOTU

Mi votu e mi rivotu

suspirannu!

Passu l’intèri notti

senza sonnu!

E li biddizzi tòi

vaiu cuntimplannu

‘ccussì ‘ntra lu mè lettu

notti e ghiornu!

Pi tia

nun pozzu cchiù

arrìpusari!

No nn’havi

paci, no

st’afflìttu cori!

Lu voi sapiri quannu

t’haiu a lassàri?

Quannu la vita mia

finisci e mori!

Ohi bedda, ohi nà!

Ohi bedda, ohi nà!

Ohi bedda, ohi nà!

Ohi bedda, ohi nà

 

VENTU C’ALLISCIA

A sira si sciogghi e la notti

si vesti ancora i milli stiddi ...

E voli straniari!

Ruffianu lu ventu c’alliscia duci

tutti cosi, u mari e a campagna,

u ciumi, e d’â cascata passa a sirinata.

Sunnu chini i chitarri

i stu cantu dill’amuri ca nnamura

e mi voli ncatinari!

Ventu di ccà, i sta terra dû Signuri ...

Fammi scutari ancora

sta musica nta l’aria cu sonnu si nnì cala.

 

VECCHIU

Vecchiu,

comu ti passaru sti ottant’anni,

‘n ti nn’accurgisti propria

chi ti strutisti la vita.

Quantu jorna passasti

sutta ô suli cucenti

zzappannu e ghiantannu,

sdirraticannu gramigna virdi,

bruciannu l’erba sicca;

siminannu,

‘ddhivannu pianti e àrbiri,

bivirannu surca e surca,

pistannu ‘n te parmenti

racina janca e nira.

Quannu ciusciava u ventu

e l’acqua ti ‘ffirrava ‘n facci,

a notti no’n putivi dòrmiri

pinzannu ca ‘bbriscennu

putivi mai ogni cosa sistimari.

Vecchiu,

varda li to’ mani spaccariati,

e ‘a facci to’ rrappata,

varda li to’ occhi

‘fussati cu suduri ‘i sangu

e p’â to’ matri terra.

Terra chi ti vitti nàsciri e crisciri.

Vecchiu,

sta terra duci e amara

t’abbrazza e ti ringrazia

strincennuti pì sempri

 

SICILIANA

Siciliana,

terra di lu suli;

Siciliana,

terra di li ciuri!

Siciliana,

terra du Signuri;

terra dill’amuri!

Ciuri di mmennulari,

d’aranci e gelsumini,

ricchizza nmenzu ô mari,

biddizza senza fini.

Li fimmini cchiù beddi,

la storia e li casteddi.

Muntagna russicata

è l’Etna nfucata;

Tutti stu Muncibeddu

lu vonnu visitari!

Chitarra e tammureddu ...

annàmucci a cantari.

Messina - Taormina,

Catania di La Piana,

Palermo a Conca d’oru,

u Tempiu d’Agrigento,

‘u Duomu i Monreale,

ca làssanu d’incantu!

Carretti arriccamati

pi strati seculari;

Pueti e sirinati

nuddu li po' scurdari.

Tòrnunu l’emigranti ...

Chiànciunu e sù cuntenti!

Siciliana,

terra di lu suli;

Siciliana,

terra di lu ciuri!

Siciliana,

terra du Signuri;

Siciliana

terra dill’amuri!

 

BANNIATA

Belle costardeddhe ...

Ô portu i pigghiaru

chi billizza chi sù,

chi sù ruosse, varda.

Jhannu u culuri

du nostru mari ...

Belle costardeddhe

 

U NOSTRU AMURI

U nostru amuri accussì beddu

cchiù d’un ciuri,

accussì forti e nvitanti

comu nu scogghiu a mari,

forza ca sulu Diu potti criari!

U nostru amuri accussì vvampa

cchiù dû focu,

accussì mperviu d’un crateri;

Trimanti canna ô ventu

e notti e ghiornu dà pena e turmentu!

U nostru amuri accussì duci

cchiù dû meli,

accussì lustru comu a luna,

splennita stidda immenza

chi nuddu po' tuccari, mancu a scenza!

U nostru amuri unicu a stu munnu!

Cuntatu, cantatu, nvitatu e disiatu,

binidittu du Signuri!

U nostru amuri spaccau puru li petri,

li frantumau e a pùbbiri

ô ventu si dispirdiu!

U nostru amuri accussì granni

cchiù du mari,

accussì tersu comu stu cielu

immenzu e d’azzurru

ccarizza sempri u cori e u fa cantari!

U nostru amuri accussì tostu

cchiù du nfernu,

accussì giuvani criatura;

Comu rutedda pazza, fistanti u sangu bugghi

d’intra ‘e brazza!

U nostru amuri accussì amuri

cchiù du suli,

accussì pergula nte vini;

Eternu e fa suffriri!

Cuntenti cu st’amuri e

 

MATRI

Matri, matruzza,

mammicedda duci,

tu mi facisti

cu l’amuri granni

e mi pascisti

e sèntiri â to’ vuci,

criscennumi cu l’ansia

ntra lu cori e affanni.

Matri, matruzza,

mammicedda amata,

curannumi ogni

istanti mi vulisti

e mi purtasti

e nzignari la strada,

chianceddu quannu

a scola mi lassasti.

Matri di tutt’i matri

nta stu munnu

li figghi toi ti

vonnu prigari

e diri "grazie" si

â sta vita vonnu

vidiriti cchiù bedda

a lu nvicchiari.

Matri di tutt’i matri

addulurati

vui siti a forza,

u nostru sintimentu,

tutt’u caluri,

u suli, l’occhi, u ciatu,

l’amuri, a nostra vita

ogni mumentu.

Matri di tutt’i matri

di sta terra,

stiddi lucenti

e ciuri profumati!

Ogni campagna

è china, ogni serra,

di vostri figghi

siti nnamurati.

Matri, matruzza,

mammicedda amuri,

comu tu mi strincisti

picciriddu ô pettu,

ccussì cu mia

ti vogghiu tinìri

ntè vini, ntà stu cori ...

e tantu affettu!

 

VEGNA ‘NSICILIA

Passau lu sestu jornu e lu Signuri

criau tuttu lu munnu e li culuri,

ma prima di vuliri a ripusari ...

fici a Sicilia nmenzu di lu mari!

A me’ Sicilia quantu è bedda e cara

a riccamata i ciuri prufumati,

scinni di munti, scurri l’acqua chiara

e u suli splenni in tutti li cuntrati!

Sicilia, canta u suli e la cascata,

cantunu l’unni e a ceddi a li balcuni,

e cantu pure iò, oh! terra amata ...

l’eternu sognu di li to’ canzuni!

E’ chista la Sicilia

dill’amuri!

‘Sta terra nostra

nun si po' scurdari!

Cu veni lassa ‘u cori

e chianci quannu parti e si nì và!

E’ chista la Sicilia

biniditta!

‘Sta terra ‘a vosi

bedda lu Signuri!

c’aranci, gelsumini

e mannarini;

Vegna 'nSicilia! Veni! T’aspettu ‘ccà!

Mènnuli ‘nciuri

vasati d’u suli,

‘stu suli ‘rrussu

chi forti nì fa;

All’aria duci

s’inventa l’amuri,

l’amuri granni

chi c’è sulu ‘ccà!

E’ chista la Sicilia

dill’amuri!

‘Sta terra nostra

nun si po' scurdari!

Cu veni lassa ‘u cori

e chianci quannu parti e si nì và!

E’ chista la Sicilia

biniditta!

‘Sta terra ‘a vosi

bedda lu Signuri!

c’aranci, gelsumini

e mannarini;

Vegna 'nSicilia! Veni! T’aspettu ‘ccà!

Ciumi p’u mari

scinnìti suliddi,

c’avìti ‘u cielu

d’azzurru accussì;

comu s’ù l’occhi

‘i Maria! dù stiddi!

L’occhi ca parranu

e diciunu si!!!

E’ chista la Sicilia

dill’amuri!

‘Sta terra nostra

nun si po' scurdari!

Cu veni lassa ‘u cori

e chianci quannu parti e si nì và!

E’ chista la Sicilia

biniditta!

‘Sta terra ‘a vosi

bedda lu Signuri!

c’aranci, gelsumini

e mannarini;

Vegna 'nSicilia! Veni! T’aspettu ‘ccà!

 

CARRITTERI

Iu,

nascìa e ci criscìa

supra u carrettu di me’patri,

chi beddu carrettu,

tuttu riccamatu d’oru.

Quannu npajava

era nu spittaculu

ca nun si po' cuntari,

ora è jittatu ddà

nta na gnuni ô scuru

e ddivintau

u regnu di lu scurpiuni,

tra fulinii e tarantuli;

Mi chianci u cori, mi chianci!

Me’ patri,

era carritteri furtunatu,

sempri cuntentu.

Puru quannu a sorti

nun l’accumpagnava,

iddu rideva e cantava,

cantava, tutta la jurnata

cantava ...

e lu cavaddu soi

era pacenziusu e forti.

Quanta strata,

quantu fatica,

quantu sudura,

quantu amuri.

Un pezzu di pani niru,

quattru coccia d’alivi salati,

na buttigghia i vinu rrussu ...

Chiddu chi guadagnava ci bastava

e ringraziava sempri a Diu,

e, cacciava, "ah! ca scurau ..."

Quannu turnava

a casa stancu mortu

s’abbrazzava a me’ matri,

poi si curcava

e sùbbitu s’addrumintava.

Avìa la facci nsurcata

e li mani ncadduti ...

Ci piacìa ddùmarisi a pipa

cu ncocciu i carbuneddu vivu

e tirava, tirava, tirava.

"Vossìa binidica patri miu ..."

Tuttu santu e binidittu figghiu ...

rispunnìa.

 

Vittorio Basile

 

PREGHIERA DUN VECCHIU

Comu du sceccu

arranca n’tà n’cchianata

così passaru l’anni

da me’ vita,

currennu supra, sutta,

addestra e a manca

senza riposu, curvannu

sempri a schina.

I tempi da gioventù passaru

di quannu padruni

era du munnu,

ora ca di vicchiaia

sugnu malatu,

mi sentu un’orfunu

sulu e abbandunatu,

sulu cu mia stissu,

chi me pinseri,

ricordi beddi e brutti

da me vita,

ma non mi lamentu,

non gridu,

non iazzu a vuci,

iò pregu Diu

e cercu un pocu i paci.

MISSAGGERU D’AMURI

Un passiru si pusò supra u barcuni,

friscannu,

ripitia u to nomi,

muvennu u beccu e tutti li so chiumi

parrava di tia e mi dicia amuri.

Vulannu si pusò supra un canali,

lu taliai

cuntannucci i me peni,

ci dissi và

non ti firmari,

vàddirici chi ci vogghiu

tantu beni.

 

SICILIANU ONESTU

Genti senza rispettu

e senza onuri;

genti senza patria

senza valuri

chianciunu i madri,

chianciunu i so figghi

ca di sta terra

n’facistu straggi.

l’Onnipotenti Diu

avia criatu

supra sta terra

nu giardinu,

n’te mani du sicilianu

l’avia datu

p’aviri un fruttu

bonu e sopraffinu.

Ma sti vermi

ca crisciunu lentamenti

di stu giardinu

tuttu s’arrusicaru,

i megghiu frutti n’fracideru

n’to nenti

terra bruciata addivintau.

Ma u sicilianu

u sicilianu onestu

a tuttu du fracidumi

nun s’arrinniu,

cu tantu amuri

a so terra zappau,

p’affari donu

all’onnipotenti Diu.

 

SOGNU D’UN VECCHIU

Sulu cu me bastuni ruppa, ruppa

n’ta bettuledda nu pani e na cipudda

na n’cchianatedda aggili e sicura,

ma pi me anni era troppu dura.

Nu pedi di castagnu s’affacciava

supra nu chianu virdi e ciuriatu

supra addu dirupu mi taliava

comu a diri:

fermiti e pigghia ciatu.

E mi fimmai sutta da friscura

a taliari tutta la natura,

aceddi ca svulazzavunu di ramu in ramu

e li farfalli c’andavunu ciuriannu,

purtaru alla me menti vuci e facci di tanta genti.

Certu cali me anni sunnu tanti,

ormai sugnu vecchiu e decadenti,

però a vita mi desi tantu

e di rimpiantu me resta pocu e nenti.

Chistu pinsava a mia stissu

quannu di luntanu tri tocchi di campana

mi distraeru di tutti i me pinseri.

U sonu rimbumbava da vaddata,

ma senza daricci tantu pinsamentu

mi susivi e pigghiai pa me strada,

n’cchianava alleggiu, alleggiu da trazzera

appuntiddannu bonu u me bastuni

pi nun pigghiari nu malu sciddicuni,

e mentri ca n’cchianava ci pinsava

a quannu era ancora carusazzu

di cursa a n’cchianava e la scinnia

cadennu chiù di navota n’to pruvulazzu.

"Oh nonnu

unni iti chi faciti

chistu nun sunnu stradi chi vui putiti fari,

stati fermu nun vi muviti

scinnu a darivi na manu p’ncchianari".

Alleggiu, alleggiu l’occhi iusai

versu da vuci frisca e scanzunata,

di supra na rocca idda scinnia

ridennu pigghiava pa me strada,

e mi lungò na manu, e m’aiutò a ncchianari

e iò già senza ciatu ristai a taliari,

bedda du occhi chi pariunu du stiddi

niri comu di capiddi arrizzulati,

labbra carnati russi comu lu focu

u coddu longu finu e delicatu,

u mentu era biancu e turniatu,

comu na vampa dintra mi trasiu

e li me senzi tutti arribillau,

u me corpu drittu nun riggiu

d’avanti al’ochi un velu si calau.

"Fimmina"

u visu tò nun é mortali

dimmi a quli genti tu apparteni

in modu ca iò pozzu ringraziari.

Oh nonnu

iò nun sugnu di sta cuntrada

e li me genti sunnu in tuttu u munnu

iò sugnu di na stirpi assai luntana

ca si ricorda l’iniziu dill’umunnu"

cu du parrari duci e rilassanti

alleggiu, allegiu m’infruscò la menti

nun ebbi chiù pinseri e affannamenti

tra li so brazza mi truvai all’istanti

e mi baciò comu n’amanti,

la me testa misi supra u so ventri

e senza chiù parrari e diri nenti

cu me bastuni fermu tra li mani

chiuderu li me occhi eternamenti.

 

 

Fortunata Cafiero Doddis

 

CHIANTU

Chianci ‘stu cori mei

lacrimi amari,

supra nu munnu

chi piddiu lu cori,

mentri lu mei

smaniusu e senza paci

sulu chinu d’amuri

pò campari.

Oh celu, celu,

biddizza du’ criatu

‘stu cantu toi

accuratu m’ammalia

e ogni goccia ca’ scinni

‘nta ‘sta terra vurria facissi

tanta pulizia.

Ma ‘st’acqua chi si posa

supra u’ munnu

sulu ‘na massa ‘i fanghu

cunnulia

e cummighiari pari

‘stu criatu

chi si scuddau oramài

l’ "AVE MARIA".

 

U PUPARU

M’arricoddu un vecchiu

di ottant’anni

cu’ l’occhi vispi

e un siguru tuscanu,

sempri affaccinnatu

‘in ‘menzu a’ genti

l’occhi pidduti

n’te pinzeri erranti,

parrava sempri

di paladini, di sciarri

e di’ giganti.

I picciriddi attornu

‘nto sèntirì

di tanta vana gloria

si’n’ginucchiavanu

arreti a ‘stu santuni

mentri l’occhi brillavunu

arreti a storie osannanti

di Rinaldu Orlandu

e cavaleri erranti.

Ultimu cantastorie

chi rallegravi ‘u cori

chi parravi di sciarri

di vittimi e d’amuri,

chi cantavi ‘a Sicilia

e l’omini d’unuri.

 

SPICCHIU DI PARADISU

L’unna i ‘stu mari

si vota e firria

accarizzannusi ‘sta terra mia,

ma a soru soi

gilusa e smaniusa

cerca ‘n’abbracciu

e si struscia cu’ ttia,

schiumazza ‘u mari

‘n’menzu a du’ amanti

sireni incantati

cu’ focu ‘nto cori,

smania e tristizza

pì cu’ và luntanu

passa lu strittu

e già voli turnari ...

Oh mari duci

chi accarizzi e vasi

‘st’amanti ardenti

sperdi ‘nte to’ sonni,

beddi ciaurusi, cantati rigini

d’ogni armunia

e mai ti sazi

di ‘sti beddi amanti

ca’ sperdi cu ttia;

Oh mari duci

quanta nustalgia

si m’alluntanu

di ‘stu quatru d’armunia

ciatu du ciatu mei

pezzu di cori,

spicchiu di paradisu

di ‘sta terra si tu.

 

Fernando Campanozzi

 

U’ STUDENTI

Eru picciriddu e mi ricordu ancora

lu chiantu ccà mi fici nà matina

quannu me fratuzzu m’accumpagnava a scola

ppì mia nun c’era cchiu nà fuitina

Erunu autri tempi, tempi d’oru

quannu la scola era nsignamentu

lu maestru o u prufissuri un gran trisoru

paterni, affettuosi chini di talentu.

D’iddi avivi suggezioni, rispettu, timuri

l’aula nà cosa sacra ti paria, la cattitra n’altari

si stava educati e zitti dd’à para duri

quannu si niscia era come arrifriscari.

Facennuni rannuzzi, furbi divintannu

quannu ncelu lu suli ni tintava

campagnola si facia, massimu tri voti l’annu

all’aria frisca lu cori si scialava.

Oggi la gioventù chi va alla scola

studiu picca ni mancia ntà la vita,

spara tutt’ì iorna campagnola

svignannisilla di cursa cu la zita.

Così li vai vidennu strati, strati

senza russuri i facci, senza virgogna

comu dd’ù francubulli appiccicati

tantu l’amuri libiru oggi regna.

Si t’azzardi di farci na romanzina

di dillu o patri o a matri d’ù ragazzu

unni, quannu? chi dici? chi mpappina?

lei stà nzunnannu, oppuru niscia pazzu!

 

L’ACQUA

Acquedottu, parola di senzu derivatu

di vocabulu limpidu e cristallinu

c’ù ama a pulizia e non è nzivatu

acqua và circannu sira e matinu.

Acqua cerca a mari lu dispersu

acqua s’implora dopu la pistilenza

acqua è necessaria ppì lu cessu

acqua, sempri acqua, ppì la simenza

ppì la simenza chi nni dugna u fruttu

ppì studari l’incendiu addumatu

acqua e ccù dici acqua dici tuttu

acqua nsemi allu pani ppù carciratu.

Acqua nvoca ntra lu lettu l’ammalata

acqua è necessaria ppù stabilimentu

acqua si vinni puru mbuttigghiata

acqua è necessaria di lu firmamentu

Acqua ccà smovi a rota du mulinu

acqua ppì l’elettrica centrali

acqua ci voli ppì putiri fari u vinu

acqua ppì ccù sveni o si senti mali.

E lu ciuri non havi bisognu dà sò acqua?

ppì l’erba chi servi ppì l’animaluzzi

non dugna latti senza erba a vacca

senza di l’acqua sunnu asciutti i puzzi!

Si vai a truvari i morti o cimiteru

purtannici un garofunu o un crisantemu

ntra li funtani acqua non nnì mitteru

arresti ... futtutu e ti senti scemu.

 

L’ALLITTIRATU E U’ PISCATURI

D’estati, ntrà marina nù matinu

passiava nù ranni allittiratu

un piscaturi ntà sò barcuzza chinu

scartava li pisci c’avia già piscatu.

L’omu di litra ebbi na pinsata

dissi allu piscaturi: ppì cortesia

pagando potrei fare una passeggiata?

in barca con la sua compagnia?

Unuri ranni mi duna vossignuria

mi dassi tempu cc’a barca mi ricettu

l’assicuru che ntà nenti in cumpagnia

lu portu a spassu mari, mari e lu dilettu.

Ntò menzu di lu strittu, cu suli liuni

dumanna l’allittiratu o piscaturi:

buon uomo conoscete Napoleone?

gnuranti sugnu, scusatimi signuri.

Che dite, non studiaste storia, geografia

Italiano, le scienze tutto il progresso?

Gnunn’ò di pisca m’innintennu, mischinu i mia;

peccato, un quarto della vostra vita avete perso.

Continuava lu piscaturi a vugari

vergugnannusi di la sò ranni gnuranza

l’allittiratu prosiquia a dumannari:

e chistu, e chiddu ccù boria e tracutanza!

Tre quarti di vita perso avete

per non avere da ragazzo studiato

or vi pentite così v’accorgete

che solo io vi avrei allor salvato!

 

I FIGGHI

Si stati intra, a casa nnì inchiti

spessu chi vostri buci n’asaspirati

ma quannu suli, suli nni truvamu

senza di nostri figghi nun nnà passamu.

Nì lamintamu picchì spessu chianciti,

nnì dispiramu picchì non studiati

vi ripigghiamu ppì guai chi faciti

e quacchi vota puru vi li ... nzuddamu!

Ranni vi faciti e vui ni lassati

vecchi nnì sintemu, scunsulati

nuddù nni po' sanari sti firiti

sulu vui, figghi! Prestu turnati.

Na matri visti chianciri na vota

c’accumpagnava un mortu ppì la strada

iddà mi dissi: picchì nun m’addunai!

chi a mia circava e iu l’abbandunai.

Figghiu spirdutu menzu a lu munnu, sulu

padri non eppi, ma cauci comu nu mulu

mai na carizza, nu baciu ppì cunfortu

ora ti chianciu figghiu, ora ccà si mortu!

 

MAMMA

D’inchiostro un veru ciumi ci vurria

e na muntagna di carta pergamena

ppì parrari matri sulu i tia

chi ppì figghi subisci e scunti ogni pena

Poi la pinna d’un poeta è necessaria

per esprimere quanto nn’ì sta a cori

na matri, ca si priva dill’aria

ppì dalla o figghiu, e senza aria mori!

Sù figghiu é tristi u sò cori si dispera

circannu a ragiuni i ssà tristezza

si ci ridi ppì idda è na bannera

ccà svetta o ventu dannici alligrizza.

Quannu ti cridi ch’idda non ti pensa

e la trascuri mancannucci i rispettu

idda è sempri ccù tia, ccà sò presenza

ti strinci notti e iornu ntò sò pettu.

Amala figghiu finu ca si a tempu e in vita

bacici li manu, adurala in tutti i tempi

la matri ppì figghi è comu a calamita

l’attira a idda e li proteggi sempri.

 

Michelangelo Campanozzi

 

A TASSA PA’ SALUTI

Quannu si tratta di spremiri nù limuni

ppì non peddiri mancu nù pocu i sucu

tutti i sistemi, tutti, sunnu boni.

Vui lu sapiti e non picchì io vu dicu.

Peggiu succedi ppì spremiri dinari

non d’un limuni, ma dall’italiani.

Ci sù Ministri chi sanni ‘nvintari

tutti i sistemi, magari i chiù strani.

Irpef, Iva, Ilor, ricivuti fiscali,

supra a binzina, sull’ogghiu riscaldanti.

Ora supra a munnizza, ‘nà vota supra u sali,

e si u limuni s’assiccau? Non ci fà nenti.

C’é sempru un ciriveddu, n’intilliggenza

ch’inventa formi novi di tributi.

Sintiti, sintiti, ma cù quali cuscenza

si fà pagari a tassa supra ... a saluti?

A saluti é nu dirittu costituzionali.

A tutti gratis av’esseri cunsuntutu

e inveci succedi cà cù si senti mali:

paga la tassa o ... non veni curatu.

A chiamanu a tassa pà saluti

e picchistu si paganu belli dinari.

Ma chi semu tutti ribbamminuti?

Nuddu ni cura, e spatti ‘emu a pagari!

 

PACI!

Chi nnì pensi Micheli

di stu bruttu ciaru di guerra.

Bruttu! Amaru chiù du feli

c’avvilena i popoli dà terra.

Comu tia Giuvanni sugnu pinsirusu

pi tutti li minazzi e lu vucìu,

chi nta stù munnu sempri chiù schifusu

tutti fà trimari, pù scantu ca finisci a schifìu.

Pirò c’é cu dissi comu nesciri di stì guai,

dilli guerri ca non s’avissiru chiù fari.

Si chiama Bahà’u’llàh, e u conuscemu i Bahài,

missaggeru di Dio’nterra, pignu du Sò amuri.

Pensa, c’é cu cridi chi cun disarmu ginirali

livannu cannuni, navi e armi nucleari

finiria lu periculu di guerri munniali

e da dù mumentu tutti ‘npaci putissimu campari.

Nui Bahài dicemu ch’é sempri megghiu

distruggiri, ittari a mari, tuttu l’armamentu.

Ma saria la paci sicura? Chistu é lù sbagghiu.

L’omu é capaci d’invintari armi novi ogni mumentu!

E allura, Micheli, non c’é spiranza?

Av’à succediri pi fozza stà brutta guerra?

E morti, o chiantu dilli madri, nuddu ci penza?

Avi a finiri scunsuntuta sta bedda terra?

Non dispirari Giuvanni, chistu, é n’autru sbagghiu!

Alli populi tutti ciù dissi bahà’u’llàh

comu si po' risorviri stu bruttu mbrogghiu.

Ci voli chi l’omu cancia, intra, ntà sò ‘ntimità.

Accuminciamu tutti a cuncurdari, chi senza riligioni

ca n’alluntana dill’amuri du Padr’Eternu

non ci po' essiri paci, picchì non semu boni

d’amari viramenti, quannu ntò cori c’é l’infernu.

La guerra, é figghia dilli divisioni,

dill’ingiustizia, da fami, dill’egoismu,

di non sintirini du munnu cittadini,

tutti: ianchi, gialli, niuri, senza chiù razzismu!

Non c’é paci, si c’é guerra di riligioni!

Non c’é paci, si c’é disparità di sessu!

Non c’é paci, si c’é u riccu e c’é cu avi fami!

Non c’é paci, si fra li popoli c’é un fossu!

E l’ultima cosa tà diri Giuvanni:

Ci voli armunia tra scienza e riligioni,

a allura sì ca paci saria "ranni"

picchì tutti sariumu chiù boni.

Emu a capiri chi semu stiddi du stissu cielu.

Chi semu ciuri du stissu iardinu,

ch’emu a strazzari di pregiudizi u velu

chi nn’orba tutti, comu lu pisci bistinu.

Stì cosi emu a fari capiri e Guvirnanti

chì sann’ancuntrari in’ ranni consultazioni"

e ‘ncuminciari subitu, all’istanti

a fari dill’umanità, nà sula nazioni.

A Natali, dissi "Martini" a Milanu

chi ci voli "un novu ordini munniali"

e io pinsava comu lu munnu é stranu,

l’avia dittu Bahà’u’llàh, ma ora s’innadduna u Cardinali.

Pirò, cu dici dici, non ci pinsamu.

Basta chi stù "novu ordini" si fà.

Io

 

‘A MOFFA O SUDDATU

Cù non sa ricodda quannu ‘na vota

non sapennu comu passarini lu tempu

magari nta na cantunera i strata

faciumu nù giocu di vecchiu stampu.

Si chiamava à moffa o suddatu

giocu spassusu e fattu ‘ncumpagnia.

Passaru tant’anni ma io non l’haiu scurdatu

e ricoddu chi sempri finia a schifiu.

Mentri ‘nta fudda, dannusi muttuni

nà timpulata n’te mani vulava

dill’amicu, in generi u chiù minchiuni

c’vanti a tutti sempri ‘mpuzzava.

Chistu la manu si sintia bruciari

e pinsannu a botta ricivuta, accussì strana,

si vutava tutti ‘ntà l’occhi a vaddari

pinduvinari cu era dù figghiu di ... bona cristiana.

L’autri, cà facci i cù non ci cuppa nenti,

stannu cu iritu nta l’aria isatu

aspittannu ca lu ... riciventi

inveci d’inzittari, avissi sbagghiatu.

‘Mpuzza ci diciunu, e ripigghiava u gioco,

e nautra timpulata a iddu arrivava

e continuannu accussì e non pi pocu

a manu a du povirazzu ntanto ci unchiava.

Mi pari ca stissa cosa succedi all’italiani

c’é sempri cu ci tocca d’impuzzari

e timpulatu sinni vidunu arrivari

‘mparticulari si sunnu: poviri cristiani.

Ma quannu ceccunu cu fù d’induvinari

si sentunu rispunniri: Io non fù se ssagghiu

e tonna sutta di novo a ‘mpuzzari

pinsannu pirò, chi tuttu é nù gran brogghiu!

 

AMURI!

Amuri, amuri, amuri comu lu pani vaiu ciccannu,

amuri pì stù munnu cussì stancu,

malatu d’egoismu, stu bruttu malannu,

amuri pù niuru, pù giallu, pù iancu.

L’omu ‘mpaccìu, fùi comu nu cavaddu furiusu

ciccannu ‘ntutt’i modi a sò felicità

e non sinn’addùna diavulu schifusu

chi com’a cecca, mai la truvirà.

Po' essiri filici, oh Signuruzzu mìu

quannu non sinn’adduna ciccànnu, ciccànnu

chi pista tutti, senza pietà e cu curriu

facennusi accussì, sulamenti dannu.

Aciuga nà lagrima, cunsola ‘nù cori,

ascùta attentu unni c’é chiantu,

unni pì fami nu picciriddu mori!

Ama lu munnu! Di chistu fatti ventu!

Non ciccari filicità ntà la ricchizza.

Dùgna nà manu a cù pi strada cadìu.

Tuttu l’autru si chiama: Munnizza,

nà cosa scillicusa, peggiu dillu siù.

Iùnciti cu li boni pirsuni;

cinn’é tanti, cecchìli e li trovi

e subìtu subìtu tu t’innaduni

ca non c’é chiù spini ‘ntà li rovi.

Amuri, amuri, amuri unn’é tu nnò sai.

Ceccùlu ‘nta paci, ntà li cosi veri;

io, stà filicità già la truvai

ntà l’amuri di Diu, u Sò signu e ‘ntò me cori.

 

A RICIVUTA FISCALI

Senti, ascuta stà truvata.

Vadda chi và dicennu Marinika.

Magari nui emu a dari na ricivuta

quannu o clienti dammu ... la fica.

Gesù, Gesù chi vai cuntannu?

Nuddu mai avia fattu stà gran pinsata

e u nostru misteri é ù chiù vecchiu du munnu.

Cuntrullari quantu ‘nni trasi ‘ntà nà nuttata?

Ma vadda, vadda, autri chi guarduni.

E a me ‘ntimità? Chistu é nù schifiu!

Ma chi c’interessa a stì sporcacciuni

di sapiri chiddi chi nnì trasiu!

Ma chi vai ‘ncucchiannu, non capisti nenti.

Si tratta di na ricevuta, ditta fiscali

ch’emu a lassari a ogni clienti,

pì pagari poi li tassi, a chistu vali.

Ma non finiu, n’tò bullittari é obbligatoriu

dichiarari l’indirizzu du tò .. laboratoriu

unni succedi la ... pristazioni

chi dugna locu a la tassazioni.

Focu chi mi hannu! Quali laburatorio?

Tutti sannu cà io travagghiu o portu.

E boni picch’issu non c’é nenti di mali

metticci l’indirizzu dà cumpagnia portuali!

Ma senti, scuta, ‘nà cosa vurria sapiri.

L’autri ... Chiddi ... Tu mi capisci

chi sunnu assai, popriu a non finiri?

Saria curiusa sapiri, comu finisci?

Comu s’ingenua, non c’é nenti di mali.

Siccomi fannu lu doppiu travagghiu

annu aumintari l’evasioni fiscali

facennu accussì, ‘nu poco d’imbrogghiu.

 

Giuseppe Carella

 

U PICCIRIDDU DI LI SANTI

Ricordu picciriddu

figghiu nu povuru ambulanti

in giru pi li festi

vinnia quatriceddi di li santi.

Era lu tempu di la caristia

però lu beni in giru si truvava

c’avìa soddi manciava e bivìa

cu non l’avìa i ciaru campava.

Passa lu tempu e tuttu si rinnova,

non campa a vicchiaredda cu na capra

ogni famigghia suggi a vita nova.

Ma sempri c’è la stissa tavulata

u ciauru d’a carni chi ssi sana

e u vinu ntê bicchieri spisiddìa.

Non manca u picciriddu di li santi

non ‘avi cchiù l’aspettu chi avìa.

E’ niru, jancu cu ll’occhi di lu celu

sumigghia u puvireddu dû vangelu.

Com’un cagnolu vadda timurusu

cusà poti ssaggiari a liccurnìa

ma prontu pi l’inchinu e nu surrisu

s’incanciu lu patruni u manna via.

Lassò a casa fami o priputenza

e a mmenzu a nui cecca la spiranza.

O terra, terra terra, terra mia

picchì fra li to figghi snaturati

c’è sempri cu è chi mancia e cu talia.

 

A RICINZIONI

In’ ogni libru trovi nu cuntornu

scrittu d’un prufissuri o d’un littratu,

comu lapuni girunu d’intornu

di chiddu chi non’ é spicificatu.

O Santu Diu u sacciu ch’è umanu

ludari di quaccunu i sintimenti,

ma nni mannati in giru un cristianu

chi va parrannu senza diri nenti.

Diciticci la cosa quantu basta

s’a ligna chi cci dduma è chidda giusta

o puru cci nni manca na catasta.

E’ comu l’epitaffiu d’a tumma

magari s’iddu mori un corvu niru

cci scrivunu cca giaci na palumma.

N'ARIDDU

N’ariddu

dici un ghiornu a na farfalla

chi ssupra a curudda si dullìa

a ttagghhiu ô ciumi

vicinu ô bastiuni:

Unni morunu li zinghiri?

Unni mori u ventu.

Unn’è lu campusantu di lu ventu?

Bah...

Na picciridda

accantu on carruzzuni gioca,

nu raggiu i suli voli un ricciuleddu

e non lu po pigghiari.

Cu ccu parra u ventu

prima d’annarisinni a ripusarsi?

Bah ... cu ghiuppu.

Ma u ghiuppu è surdu.

U ventu è comu u suonnu:

quann’è ch’è sbigghiu ô jornu

vaci girannu cu so carruzzuni.

 

 

U SCICCAREDDU

Non liticati genti di Tantiddu

quannu parrati di lu sciccareddu

si mmerita o non merita un ricordu.

Faciti munumenti a lu cavaddu,

sabbativvi li corna di lu cervu,

è chista a liggi di l’umana genti

a ccu travagghia non cci spetta nenti.

Ma vi scurdati a cosa cchiù mpurtanti;

chi Jò fui lu cavaddu di li santi,

immurtalatu assemi e picureddi

di quannu vinni nterra lu Signuri

cu boi chi re magi e chi pasturi.

E’ l’omu chi ssi scorda i cu l’aiuta

quannu travagghia sulu ntâ campagna,

manciannu sulu un pugnu di ramigna

chi cci la renni subutu a fumeri.

Si fra di vui c’è lu gnurantuzzu

non è pi cuppa di lu sciccareddu,

è la natura chi dugna d’annuzzu

facennu leva supra ô ciriveddu.

Facitulu, facitulu birbanti

pi quannu sta barbaria è finita

ammenu vi nni resta unu i crita.

 

Maria Costa

 

COLAPISCI

So matri lu chiamava: Colapisci!

sempri a mari, a mari, scura e brisci,

ciata ‘u sciroccu, zottiati sferra,

o Piscicola miu trasi ntera!

Iddu sciddicava comu anghidda

siguennu ‘u sò distinu, la sò stidda.

Annava fora, facia lagghi giri,

e Canzirri, ‘o Faru e Petri Niri.

Un ghionnu sò maistà ‘u vinni a sapiri,

e si pprisintau a iddu cù stu diri:

Iò sacciu chi si l’incantu da’ rivera

e di lu Faru potti la bannera,

scinni ‘o funnu a metri, passi e milia

e dimmi com’è cumposta la Sigilìa,

sè supra rocchi, massi o mammurina

e qual’è la posa di la tò Missina.

Ie Colapisci, figghiolu abbidienti

mpizzau ‘o funnu, rittu tempu nenti.

‘U Re facìa: chi beddu asimplari

e figghiu a Cariddi e non si nigari.

Sulligitu nchianau Colapisci

comu murina chi so’ canni lisci,

dicennu: "maistà ‘a bedda Missina

vessu punenti pari chi ssi ‘ncrina.

Sù tri culonni cà tenunu mpedi,

una è rutta, una è sana e l’autra cedi.

Ma ‘u Re tistazza ‘i gemmanisi

‘u rimannau pi’ n’autri centu stisi.

Iddu ssummau e ci dissi: Maistà

è tutta focu ‘a basi dà cità.

‘U Re ‘llampau e ‘n ‘coppu i maretta

‘i sgarru ci sfilau la vigghetta.

Giovi, Nettunu, dissi a vuci china,

quantu fu latra sta ributtatina.

Oh Colapisci, scinni lupu ‘i mari

e vidi si mi la poi tu truvari!

Era cumprimentu dà rigina,

l’haiu a malaggurio e ruina.

E Colapisci, nuncenti, figghiu miu,

‘a facci sa fici ianca dù spirìu

dicennu: Maistà gran dignitari

mi raccumannu sulu ‘o Diu dù mari.

e tempu nenti fici a gira e vota

scutuliau a cuta e a lena sciota

tagghiau ‘i centru e centru a testa sutta

e si ‘ndirizzau pà culonna rutta.

Ciccava Colapisci ‘i tutti i lati

cu di mani russi Lazzariati,

ciccau comu potti ‘ntò funnali

ma i boddira ‘nchianavanu ‘ncanali.

‘U mari avia ‘a facci ‘i viddi ramu

e allura ‘u Re ci fici ‘stu richiamu:

Colapisci chi fai, dimurasti?

e a vint’una i cavaddi foru all’asti.

E Cola cecca e cecca ‘ntà lu strittu

‘st ‘aneddu fattu, ‘ntà l’anticu Agittu.

Sò matri, mischinedda ancora ‘u chiama

cà mani a janga e ‘ncori ‘na lama.

Ma Colapisci cecca e cicchirà

st’aneddu d’oru pi l’atennità.

 

PETRU FUDDUNI

Fudduni chi nascisti ‘nta Palemmu,

‘n ‘facci la chiazza di la Vucciria

a unni cu’ vuciari si vinnia

di l’acqua cù zammù ‘o pil’i vemmu.

Tu spaccavi petri stati e ‘nvennu,

cù mazza, cù mazzotta e marabeddu,

je petra ‘i sciara ‘i chidda ‘i Muncibeddu,

comu criata fu dù Patri Eternu.

Lu spassu toi era la tavenna

‘a unni spubbricavi a tutta spanna,

lu dottu ‘i Tripi era la tò benna,

ma tu ristavi povireddu ‘n ‘canna.

Stivala ‘a tò cità a chiamava: "mula",

sedi d’infennu, di mafia e mala,

ma tu sparavi a siccu a ‘ppena ula:

"Vinturusoddi si, Turi Stivala"!

‘U populu gudia di ‘sti tiatri,

‘a tò vuci nchianava milia metri,

giuncia pì vineddi scuri e tetri

e a bastimenti ‘ pottu a vili quatri.

‘Nte festi spissu ‘ i Santa Rusulia,

nchianavi a pedi ‘o Munti Pillirinu,

prima pì stunnilari a la stranìa

je poi pì dda lamma o tessu i vinu.

Pavuni t’accuglia cù nu ‘nchinu,

stuzzicannu a tò menti chianu chianu.

"Silletta sgangata - dicivi - lustrinu,

cu ti sienti Musè o Curiulanu? "

Non ci fù cantunera e manco gnuni,

chi non fu ditta chi tò vessi strani

je ddi mani, un tempu mani sani,

ora trimannu supra nu bastuni.

Je zinzuli manciavi e pallunìa

ssittatu ‘nte bisòla d’un puttuni

ssistutu sempri i Gaia e di Talìa,

oh spaccapetri, Petru, Petru Fudduni!

Poi vinni a fari festa ‘n ‘autra musa,

dda musa latra, cù dda strana serra;

dù scappillini, dù palati ‘i terra

je ‘na balata ‘i petra ‘i Siracusa!

 

DINA E CLARENZA

Mmisi î mazzu ‘m ‘Palemmu ‘ntà scurata

‘m ‘picciottu si ‘ncazzau c’un nfrancisi,

da vuci ‘ntunau pì tutti i paisi

di la Sigilia, affritta e scunzulata.

‘Ntà Missina ci fu ‘na gran ‘n ‘zunata

di campani, sguazzati e, quattru venti,

Dina e Clarenza ruspigghiannu e genti,

‘nchianaru a pedi nterra ‘ntà travata.

Tirannu petri, frecci e mazzacani,

diciunu: Bastaddi rinculati!

dicitincillu a Callu, cori ‘i cani,

nn’havi puru pì iddu ‘i ‘sti pitrati.

Clarenza, sbraitava apettamenti:

o finiri ‘u cumannu e ‘a caristia,

pi’ vostri casi, francisi fitenti,

ittati ogghiu tutti nziemi a mmia!

Dina, ‘vanzava zizziànnu i denti,

armata d’un santissimu bastuni,

dannu coppa cu’tutti i sacramenti,

dicennu: annativinni gran ‘nfamuni!

Straqquati, suddati e prodi arceri,

scappaunu ‘ttirruti a fui fui,

e i missinisi supra ‘i balistreri,

spittaunu ‘u cumannu i tutti i dui.

‘A la fucca, cu’ cuppa e cu’ non cuppa!

diciunu li fimmini a sustegnu,

suddati ccipputi comu e ghiuppa,

chi cadiunu senza nuddu ‘mpegnu.

Callu, cu’ cabbuni ll’avia bagnatu,

accuminzau a mprumettiri e ‘ndutari

ma Dina e Clarenza, fimmini asimplari,

dissiru: no a tuttu tuttu ciatu!

E di li mura di la Caperrina,

si vitti ‘na palumma giriari,

di li francisi fu cannificina

e de la Sigilia si nn’appunu a scappari.

Dina e Clarenza, donni curaggiusi,

sunannu ‘na notti li campani,

sabbaru la citadi di soprusi,

dù aroini di Vespri Siciliani!

 

‘A Pignata

‘Nto minzaneddu de la casa da marina

unni tegnu cosi i vecchi, cosi ‘i mari,

quasi mmucciata vicinu na catina

ogi ti vitti e mi misi a pinzari:

Oh pignata, pignatedda mia,

quantu ricoddi mi svigghia ‘a tò prisenza,

penzu a cetti ionna i caristia,

quannu me patri campava cu la lenza.

sanguigna, ‘nto me cori ‘na gran piaga,

vidi a me’ matri sula, ‘ffamigghiata,

‘nn ‘avia ottu, a ranni era malata

e l’uttimu ciancìa ‘nta la naca.

Iunnati ‘i friddu di capu matina,

ciaccàva ligna d’alici e luvara,

poi mpiccicava, facia ‘na caccàra

e tu bugghivi ciciri e paglina.

C’eranu i ionna di favi a cunigghiu,

iunnati ‘i farru, siri di cicecca,

cu canuscìa ‘u filettu, ‘u sammurigghiu,

i tottellini, ‘u grattò, u lecca, lecca.

Mi ricoddu chi me matri, chianu,chianu,

ti mintìa supa ‘na codda a fomma i chiaccu,

poi inchìa piatti ‘i favi a mmaccu,

e dicia: chistu a Pippo, chistu a Tanu.

Erumu tanti, na gran tavulata,

e a menzionnu, puntuali e precisi comu Omega,

nni ssittaumu e tu, nira pignata

facivi ligumi chi era ‘na mantega.

Ma nta di ionna crudi di sciroccu,

quannu me patri non annava a piscari

tu pignatedda bugghivi sulu patati,

e nto me cori scinnìa comu on toccu.

Era l’avisu di ionna tribulati.

Poi tempi i guerra, bugghisti ‘na lattuga,

brutta, scunnuta; ah chi niri matini,

ancora vidu a mè matri cu’ l’occhi cianciulini,

cà voti non ti putia mentiri mancu supa!

 

‘U LUNTRITTU

Oh luntritteddu di li piscispadu

ora si attoggiu, senzanuddu gradu!

Hai rasti cu’ pianti e cu’ ciuri,

stipati a basciu tutti pari pari.

‘A rrota ‘i prua esti tutta aperta,

e trasi e nesci scantata na lucetta.

Iò cu la menti ricurru a lu passatu,

penzu a Nicola, ‘u figghiu du "Zitu",

quannu a sò buci e mmanu ‘a traffinera,

‘ntunava chiara pi’ tutta la rivera.

Non c’erunu machini, ne mutucicretti

ma Sampiroti supra di carretti.

‘U piscispadu, poviri nnumaleddu

era cintratu ntà nuci du coddu.

Poi Masi sveltu, comu on firringhiddu,

ci dava caloma nziemi o’ figghiu ‘i Teddu.

A muntantara t’allaggava fora

e u nnimaledddu si dibbatìa ancora.

Poi ‘ntà marina tagghiavunu i piditti

era la festa di vui niri luntritti.

E tu luntrittu, sveltu, ubbidienti

ti biavi cu st’omini i tridenti.

Ora si mutu, poviru lontrittu,

comu on vecchiareddu affrittu, affrittu.

Chi machinari e chi cosi chi nvitaru

canciau Ganzirri, canciau puru ‘u Faru.

Tu vaddi ‘u mari ‘nte ionna di calura

e i sapi ‘u celu, i tò goccia di sudura.

Penzi o siari e a du: "Voga nterra, voga fora"

quannu cu pisci ntavulavi guerra.

Sguazzannu basci du’ ocamarini,

parìa nu quadru di liri stillini.

Tu senti l’ecu di ddi forti genti

ma s’arruggiaru puru l’armamenti.

I tò pidagni non zu chi scaddilini

e ni cianci ‘u cori, pinzannu la tò fini!

 

TUNNARI

'Nnati d’oru

pi patruni, raie e tunnaroti;

i tunni passàunu a migghiara

quasi terra terra.

Chî misteri calati

ogni tunnara iaprìa i ganasci

e i tunni,

senza sapiri ‘a sò sotti,

nziccàunu ‘ntâ càmmira dâ motti.

‘Ccuminzava ‘u finimunnu:

sguazzi, scuma ianca a bugghi bugghi

a cacciofuliari,

coppa ‘i cuda,

sangu russu a paparina.

"Si vôi vìdiri ‘a ‘ccisa dî tunni

cettu chi ti ‘nzunzi a tutti i banni"

dicìa un dittu ‘nticu.

L’acqua vinìa a mancari,

i nnimali cull’occhi pappaddusi,

a strinci strinci,

scantati, ‘nzalanuti, ‘nzanguliati

annàunu ô sò distinu.

Paccuscenicu ‘nfinnali,

milli buci, milli ciaularìi

nchianàunu ô celu.

I tunnaroti cu facci staciunati,

a filirata

e armati di raffi,

‘mmiddàunu coppa cu tutti i sacramenti.

U rais ‘ntâ muciara i puttava a mmaciarti

pi ll’uttimi ssaccati.

Tunnari ‘i Favignana,

‘i Punta Raisi,

‘i Sagnoggi,

dû ‘Liveri,

dû Tonu e dû Pàssiru,

a vui stanotti

‘u cantu dû me’ cori;

e cu mi ‘scuta

‘stu pezzu di Sigìlia pidduta.

 

Ulderigo Diana

 

CENTU SIDILI...

Centu sidili e forsi notri centu,

na longa passiggiata di marina,

na barca misa a fari ‘u monumentu

e tanta genti o suli da matina.

Milazzu li so’ petri sciacquaria

‘nto mari friscu; semu ‘mprimavera.

Mi settu e vardu: a genti chiacchiaria

‘nto mentri chi passia avanti e arrera.

Un patri cu figghittu a cavadduzzu,

na matri tutta china di primuri

p’addeva chi gia’ movi ‘u primu passu,

e a nonna chi la ghiama cun amuri

mi pari un quatru dinu gran pitturi

chi s’ha scurdatu da raffineria,

chi vidi tuttu chinu di culuri

e ch’otri cosi giungiri putria.

Putria signari dda gran bancarella

chi ni mistra i so’ libri-e su’ pirnenti;

putria signari n’umbra ranni e bella

cussi’ tanta calura non si senti;

putria signari li me’ sintimenti,

la gioia pi stu ghiornu di vacanza,

chi metti nu cumogghiu e me’ turmenti

e chi trasporma ‘u chiantu ni ‘na danza.

 

L'AMURI VERU

L’amuri veru esti sì la donna

ti dugna sempri e mai ti dumanna,

e quannu dormi attia sempri si ‘nsonna

e attia si chiga duci comu canna.

L’amuri veru esti si ‘u so’ spusu

ci dugna sempri e mai ci dumanna,

non la tradisci e mai esti gilusu

la prea sempri e mai la cumanna.

L’amuri veru è chiddu di ‘na mamma

chi dugna sempri e figghi e mai dumanna,

chi silinziusa soffri e mai li chiama

e lipruteggi puru di ‘dda-banna.

L’amuri veru è chiddu di nu patri

ci mai dumanna e dugna sempri e figghi,

e li cunforta assemi cu so matri

e non sparagna mai di so cunsigghi.

L’amuri veru esti si l’amicu

ti dugna sempri e mai ti dumanna,

si avanti attia si faci nicu nicu

e quannu non ci si mai ti cunnanna.

 

WICCI 'LATRUNI

Ata sapiri chia ‘nu chiazzisi

speci si vivi a Nizza com’a-mmia,

a musca supra a nasca nuddu ‘a misi

puru ne’ posti chi nan canuscia.

Sintiti chi successi ‘na matina

mentri a Firenzi io’ facia ‘u turista:

avia bivutu e cu la panza china

passiava pi saziarimi la vista.

Ma dd’acqua minerali traditura,

chi m’ava rinfriscatu ‘n mè budeddu,

‘i rini mi sciugghiu a la bonura

e ‘a"pipi’" swini ‘nchiano’ ‘i liveddu.

Nenti paura! Mi cercu ‘nu wicci’.

Mi vardu attornu, poi caminu ‘m-pocu.,

no mentri mi crisciva la "pipi’"

e ‘a me’ testa mi diciva "ddocu",

e mi mustrava ora ‘na cantunera,

ora l’interno di ‘nu purticatu,

pirchi’ l’urgenza divintava vera

e c’era ‘u rischiu di turnar pisciatu.

"Toilette" c’era scrittu tutt’an trattu.

Un "rapidu" nan era chiu’ veloci,

curriva versu d’idda dispiratu

pi dari fini a ‘ddi duluri atroci.

Ma n’era’nu wicci’ chi canuscia.

Intra ‘na ‘ngagghia un pezzu ‘i cincucentu,

sulu cussi’ ‘dda porta si japria,

e io’ putia spugari ‘u me’ turmentu.

Comi ‘na furia misi ‘i mani ‘n.tasca

e cu gran gioia truvai ‘u passe-par-tout,

l’ansia era tanta ci ‘a munita casca,

ma finalmenti fummu a trupittu’.

Si piogghoi ‘i sordi. Ma ‘ddu lazzaruni

pariva chi pruvassi gran piaciri

a teniri ‘nchiudutu lu purtuni.

‘I me’ dulura nan vi pozzu diri!

Stringiva i jammi e tuttu mi sturciva,

tiniva cu ’na manu i me’ virgogni,

cu l’otra pugna a porta ci daciva,

pirchi’ erunu urgenti i me’ bisogni.

Mischinu a-mmia, comu mi riducia!

Frigatu di ‘na machina latruna,

chi i dinari pigghiati si l’avia

e mi facia bagnari ‘i pantaluna.

Sparti ‘u bigliettu ci l’avia pagatu.

E chistu a-mmia mi dava gran fastiddiu,

pirchini lu wicci’ m’avia gabbatu.

Criditimi, vulia fari n’eccidiu.

Ma la raggiuni e puru ‘u dutturatu

mi cunsigghiaru la filosofia:

io’ nan putia turnarmini bagnatu:

Japrii ‘acirnera e ‘a fici ‘dda ‘nta via.

 

UN BRUCU, UNA PALMA E NU LAMPIUNI

Brucu (pianta "Tamaricio")

"Donna Palmitta", ora v’aaricchistu!

Vi misiru i lampiuna ‘nta su lato,

cu si du paddi o ciancu vi facistu

chiù luminosa ed iò sugnu malatu.

Pussibuli chi vui non riguardati

lu lustru chetu di l’amica luna

ch’a nui ni carizzava ‘nnamurati?

Ora viditi sulu li lampiuna?

Palma

Ma chi vuliti, ‘npari? ... lu prugressu!

"Sono convinta" chi s’avi a cangiari,

cà sutta i bruchi avveni nu prucessu

chi all’otri lochi ‘i Nizza ‘u metti a pari.

Vardati chi su beddi sti lampiuna!

Lampiuni (con accento effemminato)

Grazie, Palmy, tu sei tanto cara!

Però arrassa un poco la tò spina

che sono delicata e cosa rara!

Brucu

Ma comu parra stranu stu lampiuni!

Esti di ferru ma non mi cunvinci,

mi pari chi ha la vuci d’un ricchiuni

e dda critina puru si lu strinci!

‘Nto mentri chi succeduu sti cosi

du ‘nnamurati veniunu a sittarsi

supra a banchina chi o Comuni vosi

pirmettiri a tutti i ripusarsi

"Amore" mbz (bacio), "Gioia" mbz (altro bacio)

Vannu li mani in zona proibita,

idda esti cotta e iddu si ci avventa.

La palma varda tutta ‘ncuriosita,

ma chidda di la luci ‘on è cuntenta.

La fidanzata

Caro! Non c’è poesia sutta ê lampiuna,

spustamuni chiù ddà sutta li bruchi,

annamunninni ô lustro di la luna

pi darci una spirciata a lumalucchi.

Palma

"Cumpari Brucu", mannaja, chi viditi?

Stu caracollu mi livò ‘u piaciri

cu la sò troppa luci, mi capiti,

di vidiri com’è chi va a finiri!

Brucu

Donna Palmitta chi vuliti fari!

Cu la modernità non c’è unn’annari,

cu sta nto scuru ci avi da vardari

cu sta nta luci s’ava rassignari!

 

‘U CODICI FISCALI
DTR CCT 53 T48 F901 S

-Cummari Pippa, comu pozzu fari?

Me’ figghiu ‘Ntoni nan si vo’ spusari.

Diventa ranni e ancora è scunchiudutu,

‘a voli ricca e nam-mu fa curnutu.

A-mmia si nan è ricca nam-m’importa,

l’interessanti chi nan è ‘na storta

e chi rispettu a sò maritu porta.

Ma sugnu certa chi nan-n’avi sorta! -

- ‘Mmari Maruzza, ci aiu ‘na figghiola

chi di l’aceddu pari la scagghiola:

ducitta e bedda esti ‘a signurina

e poi di nomu va di Cuncittina.-

- Cummari, nan capisciu ‘u vostru diri.-

- ‘Zzittitivi e lassatimi finiri!

A vostru figghiu ‘sta figghiola portu

e, vi lu giuru, nan vi fazzu ‘ntortu!-

Si lassunu d’accordu ‘i du’ cummari

cu l’isca e ‘u pilu-vermu di ghittari,

e donna Pippa a ‘ntoni va a purtari

pruposti ch’an si ponnu rifiutari.

-O ‘Ntoni, figghiu, e’ l’ura chi ti spusi

e pi sta vota nan-ni trovi scusi,

c’è ‘na figghiola chi avi i CCT

ch’ e’ puru bedda e a-ttia ti dici sì.-

‘Ddu pisci babbu japri viatu a bucca

e l’isca cu l’ingannu va e s’ammucca:

- Si è china ‘i CCT e puru è bedda

ci dugno a chista mula la me’ sedda!-

Cuntentu è ‘Ntoni pi l’affari fattu,

nan vidi nenti e firma ‘ddu cuntrattu.

Avveni tuttu ‘nta ‘nu-n-vota e svota,

ma fattu ‘u spusalizio cerca ‘a dotta:

-Cuncetta, unni sunnu i CCT

chi mi dicisti su’ cinquantatrì?-

-Maritu, su’ na tasca du fandali,

su’ scritti supra ‘u codici fiscali!-

 

... E SENTU I BRIZZI

Trubbatu é l’ariu

baraunnusu é ‘u mari,

chi stracqua ligna e rina-rina

‘nfuncia

e supra a via Marina

va a miscari

‘nte barchi ‘dda ricoti

e ghiara ‘rrunchia.

Cu a fascia o coddu

e cu passamuntagna

vardu satari a scuma

e sentu i brizzi,

chi ‘nta sta guerra ch’aiu

su carizzi

e su rifriscu

pa me’ vita dura.

Arredi a-m-mia

sentu vuciari aggenti:

cu ferra cimi

e cu ‘ncirati pigghia,

cu grida di scappari:

"L’unna ‘rriva!"

cu curri ‘ncontru a-d-idda pi giucari.

Io’ staiu fermu ‘nta stu parapigghia

e moffi du me’ mari

mi ricivu.

 

ALLUMI
(‘NA MOSTRA DI PITTURA FATTA FORA)

Austu ‘i sira.

Vista da San Miceli, Allumi é nira.

‘Nto cielu c’esti sulu menza luna,

‘na boria c’é chi sciuscia e chi non dura.

Tra ‘i casi o scuru e ‘u jatu campanaru

si vidi ‘na vinedda illuminata

cu ‘a chiazza da Matrici e ‘a scalunata:

é dda chi a genti cerca la friscura,

si movi lentamenti e ci dimura,

si ferma avanti e quadri e si studdia

e tra un giudiziu e n’otru ciuciulia.

 

VIRITÀ

Raggiu di suli chi carizzi u mari

e chi rusbigghi u munnu ‘ddurmintatu,

parra a la genti e dicci ‘sti pinzeri!

Dicci chi l’acqua azzurra è ‘na facciata

chi sutta sutta manca di culuri;

dicci c’u cielu cu la nuvulata

non è ‘ccussì comu all’occhiu si vidi;

dicci chi amuri fattu ‘nta nuttata

muccia a la vista tutti li difetti

e chiddu chi parìa essiri bellu

vistu a la luci inveci nun valìa;

dicci a la genti ancora di vaddari

unni c’è festa e canti d’alligria

chi ‘dda sicuramenti pô scupriri

c’a facci allegra sutta lagrimìa,

c’a virità non è chidda chi pari

chi cangia facci comu i sintimenti.

La virità è una sulamenti

e va circata sempri dintra ô cori.

 

Rosa Gazzara

 

CASA ANTICA

Passu davanti a la me ‘ cas’antica

e calu l’occhi, pri non rigurdari

li cosi beddi chi ‘sta casa amica

‘nt’e’ mura teni chiusi: cosi rari ...

Rigordi di me’ patri, di me’ mamma,

di la ‘nnuccenza di la giuvintù:

mi brucianu ‘nt’ ô cori comu fiamma

ddi vuci chi non tornanu mai cchiù.

E sentu vivu ‘nu richiamu amaru,

chi mi sprofunna ‘nta’nu paradisu

unni voli spazziari ‘u me’ pinzeru

pirchì cc’è d’i me’ vecchi lu surrisu ...

Lu cori è chinu di malincunia;

ma tutt’on trattu lu pinzeru vola:

‘na vuci amata sentu ‘mpress’a mia

e mi suspira chi non sugnu sula.

Non vogghiu cchiù vardari a cas’antica;

vogghiu campari pri lu novu amuri:

vicin’a mia cc’è l’omu d’a me’ vita

chi teni strittu strittu lu me’ cori.

 

ANGARIA

Vi pari picca ‘ranni l’angarìa

pri ‘na signura di li nostri jorna

‘ncuntrari ‘nt’on negòzziu o pri la via

l’amica chi, felici, si nni torna

pirchì fici l’acquistu d’un "Visuni"? ...

Capistu? , d’a pilliccia cchiù eleganti

chi custa quasi quasi sei miliuni.

Unn’i pigghiau i sordi dda ‘ntricanti?

E’ cosa di manciarisi la bili:

surgi du cori comu ‘na vampata!

... E torn’a casa virdi com’a feli

la povira signura ‘nvilinata.

‘A sira lu maritu, stancu mortu

d’i patimenti d’u straurdinariu,

ritorna intra e cerca lu cunfortu

di ‘nu surrisu duci. Ma, ô cuntrariu,

‘u spett’avant’a porta so mugghieri:

gialla comu si fussi pitturata,

pronta pri farlu bonu trantuliari

comu la pasta intra d’a pignata.

Lu puvireddu, a dd’aria di timpesta,

nenti sapennu e nenti cumprinnennu,

sbannatu, vard’a so mugghieri e resta;

e si dumanna quali bruttu dannu

cci ficiru a dda fimmina ballanti.

E idda, cu ‘na vuci di jaddina

chi sta sbigghiannu tutti li durmenti,

cci ‘rriva ‘i supra e, quannu è vicina,

cci dici forti: - Quali privileggiu

hannu l’amichi me’?! Pur’u "visuni"

ch’è la pilliccia d’u cchiù raru preggiu,

cci vitti a chidda chi sta ‘nt’o purtuni ... !

Lu poviru tapinu, mort’i fami,

chi p’a stanchizza non cci par’addritta,

non havi forza ‘i fari quattru brami

contr’a sta so mugghieri maliditta.

All’ultimu, cu ‘na vucitta ‘i nenti

chi quasi quasi parirìa gentili

cci dici a dda malvaggia guirriggianti:

... Va beni! Vaju e pigghiu lu fucili

di lu me’ nonnu; li cartoccia ‘ccattu:

di dumani mi mettu e’ cantuneri

e sparu ogni vota chi ‘nu jattu

mi pass’accantu. ‘Ccussì sulu speri

d’aviri ‘na pilliccia: ‘i jattaredda

figghitta me’, t’a pozzu cumminari.

Si poi tu parri ancora, figghicedda,

ti sparu a tia; e mi fazzu ‘rristari!

 

SALOTTU

Fui ‘nvitata ‘nta ‘na festa

‘nt’on salottu canuscenti;

mi mittìa ‘na bedda vesta

e partìa, tutt’eleganti.

Jò ‘rrivai quann’i ‘nvitati

già d’un pezzu eranu ddà:

chi signuri ‘ngiujllati ...

cc’era a schiuma d’a cità!

Fui sturduta d’u striliari

d’i so vuci trummittianti,

chi facìanu rumuri

comu papiri ‘ncripanti.

Cc’era chidda chi parrava

senza posa: ‘na ciumara

di palori si jittava

d’a so bucca supr’a ‘mara,

pacinziusa, sfurtunata,

chi scutava, puviredda

(comu quasi ‘ddurmintata)

dda stunata ciaramedda ...

Cchiù pi ddà, ‘ttillata e tisa,

‘na spusina ‘mpillicciata:

stava tantu ritta misa

chi mi pars’inamidata.

"Quant’è beddu stu brillanti!

Chi divinu braccialettu ..." ,

cci dicìanu tutti quanti

c’u velenu dintr’ô pettu ...

Cc’era intantu ‘u maggiurdomu

chi firriava c’a ‘nguantera:

mi vardava tomu tomu

comu fussi ‘na pantera.

Mi parìa ‘nu mammaluccu

quannu, accantu d’u buffè,

mi purgìa com’un cuccu

‘na tazzina di cafè.

Supr’a tutti dominava

lu pinnacchiu d’un cappeddu:

‘na vicchiotta s’u sfuggiava.

E mi parsi chi dd’aceddu

sbulazzanti e culuratu

d’a so testa tutt’un trattu

supr’a nostra avrìa vulatu ...

Chi v’e’ diri? Chi stu fattu,

stu pinzeri origginali

mi mittìu di n’allegrìa

veramenti ecceziunali

ch’è sicuru, riflittìa

‘nt’ê me’ occhi ‘na risata;

mentri tutta l’espressioni

d’a me’ facci era ‘ppuntata:

era adatta all’occasioni ...

Signureddi raffinati,

ciarlatani, salutteri,

forsi mai vui ripinzati

comu sunnu sempri veri

li palori d’i cchiù vecchi?

Jò rigordu: un Prufissuri

mi dicìa sempri ‘nt’a ‘ricchi

quannu tutti ‘sti signuri,

beddi commudi ‘ssittati,

discutìanu senza posa

d’i so ‘ntrichi ‘nfervurati

‘nt’ô salottu d’a so casa:

"Campidogghiu, figghia mia!

Campidogghiu, n’o sai tu?"

... Chi, tradottu, poi sarìa:

"Sunnu ochi; e nenti cchiù!"

 

‘NA SIRINATA

Aviti mai pruvatu lu piaciri

di sentiri ‘nt’o centru da nuttata

(quannu ‘ntr’e’ sonni volanu i pinzeri ...)

li noti di ‘na bedda sirinata?

Jò sugnu ... paisana d’adozioni

e tuttu quantu sapi di paisi

mi apri ‘u cori a ‘na cummuzioni,

mentri mi scordu d’essiri burgisi:

mi ‘ntinnirisciu; e sentu dintr’e’ vini

‘na gran langura, comu ‘nu richiamu

chi veni d’a me’ terra china ‘i spini

ma tantu ricca ‘i musica e profumu ... ,

... chi scinni di lu ventu ‘i tramuntana

carricu ‘i gloria e vanitusu assai

pirchì è superbu di sta so patruna

chi nuddu cori po’ scurdari mai.

‘Ccussì, quannu ‘nu latru cantaturi

rubba li notti ô libbru di ‘na fata,

nasci ‘ntr’a notti e mi commov’u cori

a cchiù dulenti e duci sirinata.

Affunna ‘ntr’e’ rigordi ‘u sintimentu:

‘ssapuru la divina melodìa,

mentri di l’occhi sciddica ‘nu chiantu

ch’è tuttu amuri pri la terra mia.

 

U’ ME’ SURRISU

Scinni a ciumara di la vita

mia

e alleggiu alleggiu

si trascin’appressu

a frischizza d’i jorna luminusi,

gioj, duluri, chianti:

tutti ‘nsemi.

‘U me’ surrisu è ‘ngannu

troppu spissu:

è ‘ngannu pirchì

nuddu hav’a sapiri

a cruci chi mi portu

dintr’ô cori.

E la me’ cruci

ora a vogghiu diri:

avìa ‘na stidda

chi lucìa ‘ntr’a casa:

‘na stidda bedd’assai,

un picciriddu, figghiu di me’ figghiu,

ciatu d’u me’ ciatu.

A vuci so era

cantu d’acidduzzu:

e iddu a me’ spiranza, ‘u me’ prugettu,

era l’amicu me’, figghiu ‘i me’ figghiu.

‘Na matina ‘i jinnaru

s’addurmiscìu pri sempri:

jancu jancu,

era ‘na purcillana ‘lluminata,

stinnutu supr’ô lettu

cu la curuna d’a Madonna ‘ncudduriata

‘nt’e’ manu.

... E jò chi m’u vardava

e jò chi non chiancìa

e jò chi cci dicìa

cu ciatu liggittu pri non scunzari a nuddu

d’accussì:

- Dammi ‘na manu tu, ora chi pòi ...

Dda matina ristai sula sulitta,

nonna puviredda.

Quattru vampitti di niputi beddi

mi trottanu d’attornu, fistuleri.

Ma jò, spirduta, i cuntu:

unu, dui, tri, quattru ...

E iddu?

E a stidda me? Unni la trovu?

Vardu ‘nt’o celu e a cercu:

no, n’a trovu ... : ancora no.

Non sacciu forsi bonu vardari

‘m menz’a li stiddi

chidda giusta

chi luccica pri mia.

E allura

megghiu chiudiri l’occhi

e riguardari

‘na vucitta d’aceddu

chi cantava ‘ntra la me’ casa,

quannu la casa me’ era felici.

Eccu pirchì

cu’ varda ‘u me’ surrisu

forsi si pirsuadi ch’è sinceru.

Ma sinceru non è:

in Paradisu

sta ‘n’anciuleddu ch’era l’amicu me’

e chi vidu sulamenti ‘nt’o sonnu.

Sulamenti ‘nt’o sonnu ... :

troppu povira cosa, scunsulata.

... Scinni a ciumara di la vita mia

e alleggiu alleggiu si trascina appressu

comu ‘ntra ‘na cullitta

un cantu di prighera:

- Sulu Tu, Madonna santa,

chi chiancisti la morti di To’ Figghiu,

pòi capiri lu chiantu d’u me’ cori;

e ‘u me’ surrisu è fintu:

pirchì ‘mmuccia ‘u duluri di ‘na matri

chi pirdìu ‘nu piccittu:

carni d’a so carni.

 

‘NA BANNA D’ASSASSINI

Cc’è ‘n’orchestra paisana

ch’è d’a zona a cchiù putenti:

cchiù stunata ‘i ‘na campana.

P’a bravura ‘i l’orchestranti

po’ cumpetiri c’a Scala,

c’u teatru cchiù sintutu;

‘nt’e’ sirati di gran gala

cu’ cci capita è ... spacciatu!

Ogni sira cc’è riunioni

p’accurdari li strumenti:

non vi dicu la passioni

e li noti stravaganti ...

‘U maistru c’a bacchetta

pari fussi Toscanini:

pigghia i fogghi, frisca, detta

a ddi poviri tapini

chi non sannu ‘ncudduriari

quattru noti sistimati

senza ‘u minimu stunari.

... E l’auturi, massacrati

di ddi trummi e ddi piattini,

lassirìun’u campusantu

p’ammazzari ... dd’assassini,

d’u paisi ‘u megghiu vantu!

Quannu nesci in prucissiuni

tutt’a banna ‘nt’o paisi

c’a divisa ‘i l’occasioni,

cc’è di moriri d’i risi:

cc’è ‘u zu’ Petru c’u trummuni,

musicanti suprafinu,

niru comu ‘nu scurpiuni,

siccu comu ‘nu sticchinu;

mentr’a zita, ‘ngiuillata,

cala l’occhi ô so passaggiu ... :

- Chi figghiola furtunata!

Haju ‘nu zitu beddu e saggiu! -

Cchiù lunghittu di ‘nu spangu,

‘u zu Peppi c’a grancascia

e a cravatta russu sangu.

Non s’a passa tanta liscia

pirchì arreri, ch’i mazzola,

cc’è ... du’ metri di viddanu:

chistu batti e Peppi vola,

come fussi in aeriuplanu ...

Pari quasi ‘nu destinu

pi divertiri li genti:

‘u zu Peppi e don Crispinu:

un nanittu e ‘nu giganti.

... Cca l’elencu va ‘llungannu.

Cari amici, mettu puntu;

e vi ‘nvitu pi ‘n’autr’annu

l’ottu maggiu e’ sett’in puntu

a sta festa di paisi.

‘Pprofittat’i l’occasioni;

nni faremu quattru risi:

quattru risi ...’ i chiddi boni!

 

Filippo Panarello

 

‘N VACANZA A MISSINA

Mi fici ‘na passiata ‘na matina,

e non sapìa ppi ‘unni avia annari.

Pinsai: - "Vaiu ppi munti, o pa’ marina?"

Mi dicidìa e annai a ‘Ntinnammari!

Quannu arrivai ddha ‘ssupra, li me’ occhi

supra Missina, fissi, si pusaru.

Forsi, nuddhu ci cridi, ma ‘i me’ ginocchi

comu li canni ‘o ventu mi trimaru.

Spittaculu di Diu! Chi cosa ranni

si vidi di ddha ‘ssupra, ‘sta Missina!

‘U portu, Riggiu e Villa S. Giuvanni

parunu cascia d’oru ‘i argentu china.

‘Rristai ‘ncantatu! Non potti ciatari!

Di ‘ss’occhi mei, du’ lacrimi spuntaru.

Era già tardu e ‘mmi ‘nn’avia a turnari;

turnari arredi ‘mmi parìa amaru.

‘U cori mi battìa fotti, fotti.

Disiddhirai d’essiri ‘n pitturi,

ristarimminni ddha ppi tutta ‘a notti

e fari ‘n quadru di lu so’ sprinnuri.

Strada facennu, avia ‘u me’ cori chinu:

gioia e tristizza erunu ‘mmiscati.

Quannu Missina poi fu chiù vicinu,

dissi ‘sti frasi, du cori dittati:

Quantu sì bedda tu, Missina mia,

terra d’incantu, eterna primavera!

Nuddha città, ‘ppi mia, è chiù bedda ‘i tia,

tu sì filicità, sì gioia vera.

Ma quannu poi ti lassu, ‘ppi turnari

d’unni partia pi ‘sta me’ vacanza,

vaddhu ‘a me’ terra, ‘u portu, lu me mari.

Mi strinci ‘u cori, mentri ‘a navi avanza

e mi gnunìu ‘nto ‘n’angulu a vaddhari

‘sta beddha terra ‘unni iò nascìa.

Vaddhu tutta ‘a rivera e ‘Ntinnammari

e cchiù s’accrisci ‘a me’ malincunia.

Ma c’haiu ‘a fari! Vosi accussì ‘u distinu.

Voli chi staiu ddha ‘ssupra, ‘n continenti,

pirchì lu me’ cuffari è ddha, ‘a Turinu,

ma lu me’ cori è cca, tra la me’ genti,

e quannu pozzu, una o du’ voti l’annu,

mi mettu ‘n viaggiu e vegnu ‘a stari ccà.

Ma ‘a me’ filicità finisci, quannu

t’haiu ‘a lassari, ed è turnari ddhà.

 

DAMUNI ‘A MANU

Comu ddhu perli sù Missina e Villa,

terri ‘nfatati di Cariddhi e Scilla.

L’acqua profunna di ‘st’azzurru mari,

ca so’ ducizza sapi ‘ncatinari.

Non c’è biddhizza chi li po' eguagliari,

sù lochi fatta apposta pi ‘ncantari

e si di notti splenni, china, ‘a luna,

‘ntra l’aria senti ‘i noti ‘i ‘na canzuna.

Tutti ‘i so’ figghi sù pueti rari

chi amuri dannu cu lu sò parrari,

e tantu è lu calari e ‘a simpatia,

chi ognunu dici: - Beddha è ‘a terra mia! -

‘A la to’ ribba, s’iddhu iò putissi

faria ch’iddu chi ‘n ghiornu fici Ulissi:

supra ‘a rina, ‘ittatu a ginucchiuni,

di gioia a bagniria di lacrimuni.

S’a nostra è puisia, damuni ‘a manu,

non è poi veru chi stamu luntanu,

pirchì l’aceddhi tutti, ogni matina,

vennu e vannu, p’a nostra marina

e ‘a so’ friscata, china d’armunia,

‘a ognunu ‘i nui dugna cumpagnia:

- Spicchìunu l’occhi vostri, ‘ntra stu mari!

Siti du Strittu, li figghi chiù cari!

SULU SCUMAZZA .....

Quannu la riti jettu ‘ntra lu mari,

‘nzemi ad iddha paru ‘i sprufunnari

‘ntra li misteri chi dda ssutta sunnu

sempri chiù scuri, soprattuttu o funnu!

Quannu la tiru, chinu di spiranza,

si ‘ntucciunia tutta la me’ panza,

pirchì a mari non ci ‘nn’è taverni

e non si ponnu vinciri quaterni.

Mentri l’acqua di buca va sculannu,

mancu ‘na cuda ‘i pisci va ristannu,

e a lu so’ postu, tanta ‘i dda scumazza

chi càdiri mi fa tutti ‘i du’ brazza.

 

Teresa Rizzo

 

MADUNNUZZA DU PORTU

Madunnuzza du portu

chi benedici e vigghi

‘ntra di ‘stà città

comu ‘na vera matri.

Di toi prisenza pia

spicchiunu l’agnuni

e cantunu li pisci

‘na sinfunia argintata.

Volunu li gabbiani, e

sfirmànnu milli giri

rutiunu supra a Tia

baciannuti li pedi.

Lassa cu va emigratu

lu cori ‘nte To mani

pu jornu nun luntanu

di rividiri a Tia.

O Madunnuzza bedda

lu ciatu Toi aggigghia

comu ‘na rosa i maggiu

intra stu sciusciu i scuma

du strittu di Missina.

Li pampini e li ciuri

‘nfiammati di stu locu

fruscìunu ccà sempri

sutta nu raggiu i luna.

Firriunu ‘ntà st’isula

aceddi ccà addivati

cu l’erba friscaliunu

l’etenna primavera.

 

 

I CIURI DA SICILIA

Ciuri, ciuri di chimera

Ciuri, ciuri d’amuri.

Signuri e signurini

i ciuri da Sicilia

aviti vui accattari:

vi dugnu i ciuri ‘i zagara

cu lu profumu ‘i mari,

si nu volu i palumedda

vuliti arricurdari.

Da vostra fimminedda

putiti vui spirari

na chiesa, nu velu iancu

s’a zagara arrigalati.

Ciuri, ciuri di chimera

ciuri, ciuri d’amuri.

Chi ciura da Sicilia

vi vogghiu arricriari:

vuliti u gelsuminu

da dare e signurini.

Vui cu stu meli d’api

ci ‘mprufumati i mani.

Chi baci e cu sti ciuri

lu cori ci pigghiati

Sti ciuri da Sicilia

vi fannu cunquistari.

N’to calici lu mari,

lu suli n’ta li petali

fannu a vui sugnari:

chi nu Paradisu è st’isula

pi’ ciatu du Criatu.

Di ciuri da Sicilia

rispira supibbiusu

u Portu prufumatu.

SALICI: A FESTA DU PANI CAUDDU

Vuliti vui viniri?

Signuri e Signurini

masculi e femmineddi

ranni e picciriddi

sentiti nu mumentu

a ogni me parola

pigghiatila cu li pinzi

e facitini poi scola.

Senti, cumpari Nicola

e tu cummari Vicenza

a tia cu l’anchi sicchi

ca gonna stritta

e cu lu tronu all’aria.

A vui vi vogghiu diri

chi veniri a stu paisi

ormai iè tradiziuni

d’ogni autorità.

Vennu pi la festa,

pi donna Pruvvidenza

e pi lu pani cauddu;

e si la strata è rutta,

a scola non funziona

a fogna poi nu scarica

e i luci sunnu a malappena,

in coru iddi arrispunnunu

"Si può quel che si fa!"

E già, pi stu paisi

tra i canci du guvennu

tra i crisi da finanza

‘nta st’isula uora si scatina

a fantasia di nu Libbicu.

E’ troppu viramenti!

Felicità è pi chistu

aviri u pani cauddu

ballari ‘nta sta chiazza