Silenzio Cantatore
Lama - Bovio

Zitta, stanotte nun dicere niente
cademe 'mbraccia, ma senza parlà.....
Dormeno 'e ccose nu suonno lucente....
nu suonno 'e 'na notte d'està:
Marì, dint' 'o silenzio,
- silenzio cantatore -
nun te dico parole d'ammore,
ma t' 'e ddice 'stu mare pe' me!....
Dimme: stanotte si' tutta d'a mia?
Ll'uocchie tuoje belle me diceno 'e si.....
No, cu 'sta luna...nisciuna buscia
'sta vocca busciarda po' di'!....
Marì, dint' 'o silenzio,
- silenzio cantatore -
nun te dico parole d'ammore
ma t' e' dice 'stu cielo pe' me.....
Cielo, rispunne! Rispunneme, mare...!
Stelle, pecchè nun vulite parlà?
Napule, e dimme: Sò ddoce o so' amare
'sti lacreme c'aggia jettà?....
Marì, dint' 'o silenzio
- silenzio cantatore -
nun te dico parole d'ammore,
ma t'e' ddice 'o silenzio pe' me!.....
Zitta! Marì!!