Chi nasce bella nun è puverella
Ma ‘e vvote ‘o ditto antico po’ sbaglià
Napoli è sempre la città più bella
Ma è puverella e nun ‘o può negà .
Tant’anne fa gia mmano a Masaniello
Pareva che quaccosa eva cagnà
Ma so’ passate ll’anne e chesto è ‘o bello
Ca nuje ‘a fatica ccà l’imma ‘nventà.

Napoli Urra’ - Napoli Urrà
‘o professore ‘o mannammo a scupà
Napoli urra’ - Napoli urrà –
‘o raggiuniere ‘o facchino va a fa
Napoli urra’ – Napoli urrà –
So’ quatto sorde putite arrangià
‘a pacienza , ‘a pacienza ‘a tenimmo
‘a quanno ‘e Borbone venettero ccà , Napoli Urrà !

Mariuole ,scippature e malandrine
Nun stanno certamente sulo ccà
Comme ‘a munnezza e ‘o poco d’ammuina
Nun so’ sulo difette ‘e sta città .

Napoli Urra’-Napoli urrà –
Tutta ‘a bellezza d’’o munno sta ccà
Napoli urra’-Napoli urrà –
Chi ‘a va sparlanno nun tene che fa
Napoli Urra’-Napoli Urrà
Chi nun l’ha vista n’ha ‘ntise ‘e parlà
Tutt’’a ggente d’’o munno ha giurato
Che primma ca more s’’a vene a vasà,Napoli Urrà !

Napoli urrà’-Napoli urrà
Ma sulo ‘e te vonno sempe sparlà
Ma tu ‘o ssaje ca è sultanto l’invidia
Pecchè si ‘a cchiù bella, ‘a cchiù bella città-Napoli Urrà!